Na novèmber 2020 Gobièrnu di Kòrsou a otorgá na Fundashon Alton Paas un Lisensia, (esta ‘vergunning’) pa duna kuido (chronische begeleiding) den forma di ehersisio speshal na personanan ku un limitashon fisiko.
Fundashon Alton Paas a keda fundá na aña 2012 ku e konvikshon firme ku mester di un fasilidat kaminda e persona ku limitashon fisiko por hasi ehersisio. Ora e persona kaba ku su rehabilitashon na ‘Revalidatiecentrum Curaçao’ i ta na kas, mester tin un kaminda ku e por hasi ehersisio pa mantené loke el a logra i bai mas dilanti. Pesei un di e metanan den statuto di Fundashon Alton Paas ta pa ‘stimulá i yuda lanta un fasilidat pa ofresé terapia basa riba aktividat i ehersisio intensivo.
Un kurpa humano ta traha pa sinta, lanta para i kana. Esaki ta yuda ku e kurpa ta keda saludabel. Ora un persona tin un parálisis, ku no por lanta para i kana mas, su salú ta bai patras. Parálisis ta trese ku ne difikultat na blas i tripa, dependensia di otronan, limitashon di move i risiko haltu pa komplikashonnan di salú, entre otro herida di kueru. WHO ta rekomendá den nan ‘Global Recommendation on Physical Activity for Health’ pa un persona ku no por move, pa hasi ehersisio intensive pa 300 minüt pa siman pa evitá komplikashonnan di salú. Sentro di rehabilitashon Raede na Amsterdam huntu ku Universidat di Amsterdam a hasi un investigashon i ta bisa ku moveshon konstante di e partinan ku ta paralisá ta nesesario pa tene e kurpa saludabel.
Na Merka ya pa mas ku 20 aña siensia a probá ku un persona ku haña un limitashon fisiko pa medio di un aksidente òf 
malesa mester hasi ehersisio pa mantené un bon kalidat di bida i evitá ku e ta haña komplikashonnan mediko. Un método ku a keda krea pa esaki ta ehersisio basa riba aktividatnan intensivo (ABT). Na 2013 Fundashona Alton Paas a bishitá Project Walk na Merka pa eksperensiá e método aki. Na 2018 a trese un di e gurunan riba e método, sr. Eric Harnes di Neuro Ex Inc., aki na Kòrsou pa sertifiká 3 persona na Kòrsou pa duna e tipo di ehersisio speshal aki.
Después di esaki Fundashon Alton Paas a kuminsá diferente trayekto pa eksperensiá e método aki pa ku e diferente personanan ku a partisipá den e trayektonan. E resultadonan tabata fenomenal.
Un persona ku haña un parálisis dor di un SCI (dwarslaesie), CVA (ataque selebral) òf kualke otro situashon di parálisis ta bai hospital promé. Después di e fase aki ta bai e segundo fase na Sentro di Rehabilitashon Kòrsou. Ora e segundo fase kaba, e persona por kuminsá su di tres fase ‘longtime aftercare’ (periodo largu di kuido posterior) serka Fundashon Alton Paas den su sentro, AP Center.
Awor e trabaonan aki ta rekonosé pa Gobiernu di Kòrsou. E proseso pa dialogá ku seguronan a start. Nos ta konfia ku esaki tambe lo kana bon na bienestar di personanan ku un limitashon fisiko.
