Tin un dicho ta bisa ku ta un kurpa bo tin i bo tin kuid’é bon. Na momentu ku bo kurpa tin un paralisis e ta bira aún mas importante pa kuida pasobra e ta mas vulnerabel pa haña otro difikultatnan. Pesei awe lo bo por lesa e importansia i e benifisionan pa abo ku tin un parálisis keda den moveshon.
Bo ta sintibo bon
Tin diferente estudio hasí ku ta mustra ku hendenan ku ta hasi ehersisio ta sinti nan mes bon mas tantu kompará ku hende ku no ta hasi ehersisio. Ora un hende ta hasiendo ehersisio su kurpa ta saka un hormona den su sanger ku yama ‘Endorfina’. E hormona aki ta esun ku ta laga un hende sinti’é dushi. Pesei tin hende ku kisas no tatin smak di bai gym òf train pero despues ku nan kaba semper nan ta sinti bon ku nan a hasi’é. Pa un persona ku ta sufri di un paralisis ta konta meskos, e por yuda bo sinti bo mihó. Mas regular bo hasi’é, mas frekuente bo ta sinti bo bon.
Wesunan ta bai menos atras
Nos kurpa a keda traha pa lanta para, move i karga nos peso. Na momentu ku nos ta hopi riba kama òf den ròlstul esei ta sosodiendo menos. Esei ta pone ku entre otro nos wesunan no ta haña e vitaminanan ku e mester ni a preshon di nos peso pa e por keda fuerte. Esaki ta sosodé tambe ku astronoutanan ku bai den espacio. Dor ku no tin gravedat i bo por move ku menos esfuerso, bo wesunan ta bira debil. Pesei astronoutanan ta obligá pa sigui un skema di ehersisio strikto pa mantené nan masa muskular i salú di nan wesunan. Pa personanan den ròlstul tambe spesial e area di heup bai abou ta bira mas fragil. Pesei ta importante keda den moveshon, lanta para sea den un mashin spesial òf si bo por hasi’é bo mes. Bai na rudia tira bala, gatia i rèk kue kos. Tur otro tipo di ehersisio ku bo por hasi ta yuda. Asta si ta ku bo brasa so, esei mes ta miho ku keda sin hasi nada. Tur esakinan por yuda ku e wesunan ta bai menos atras i ku e risiko pa un fraktura por ta menos.
Mantene muskulonan salú
Nos muskulonan den nos kurpa ta loke ta yuda nos hasi moveshon. Na momentu ku nan keda paralisá dor di sea un dwarslaesie òf kualke otro desabilidat neurologiko nan ta kuminsá krimp, bira steif i asta nan por haña spasme (moveshon inboluntario). Esakinan por pone ku ta difísil pa move por ehèmpel e brasa paso e no por rèk kompletu mas. òf ta dolo pa hinsa e pia, dor ku e muskulo a bira mas chiki ta mas fasil pa e wesu primi riba e kueru na sierto kaminda ku ta okashoná herida mas lihé.
Na momentu ku bo kuminsá hasi ehersisio i asta ku e parti nan ku no por move, bo ta yuda sirkulashon di sanger ku e muskulonan ta keda salu, nan ta bira menos steif i lo por hasi menos dolo.
Mehorá Independensia
Na momentu ku un persona den ròlstul ta keda aktivo fisikamente i e ta hasi ehersisio regular, e ta logra hasi hopi mas den un dia pasobra e tin energia, su kurpa ta move mas fasil i e ta menos steif. Tin bia bo ta mira tambe ku despues di tempu tin kosnan ku den pasado bo no por a hasi ku awor si bo ta logra hasi pasobra bo tin mas forsa. Dus kosnan ta bai mas lihe i of mas fasil. Esei ta yuda bo bira mas independiente durante bo dia.
Evitá komplikashonnan mediko
Na momentu ku un persona haña un paralisis su organonan tambe por keda afektá. Esei ta dependé kon ela yega na su paralisis. Esei ta nifiká ku e ta kore e risiko ku su organonan tambe kisas no ta funshoná manera antes. Den kaso di dwarslaesie hopi bia baimentu di af i oriná no ta sosodé manera antes. Dor di hasi ehersisio, depende na kua parti di e kurpa, bo ta stimulá bo tripanan i blas ku nan ta logra saka shushi regular. Si bo ta sinta ketu i no ta moviendo, ni bo tripa ni blas di orina no ta haña un stimulashon èkstra pa funshoná. Meskos ku ora bo ta drumi hopi, bo kurason ta bati menos fuerte pasobra e por pòmp sanger mas fasil manda rònt bo kurpa. Na momentu ku e kustumá ku esei i despues di tempu ku bo ke bai move òf hasi kosnan èkstra e ta tuma bo hopi mas esfuerso, bo ta haña biramentu di kabes mas lihé, bo ta kansa mas lihé. Pues dor di keda hasi ehersisio bo ta evitá esakinan.
Esakinan ta algun di e motibunan importante i benifisionan pa keda move apesar kubo por tin un paralisis. Na AP Center ku ta keda den Colon tin diferente ekipo, asistente i trainer sertifiká ku por mustra bo i yuda bo hasi tur e moveshon pa asina bo por tin un mihó kondishon i mas forsa ku bo por logra e metanan ku bo a pone pa bo mes. Si bo tin kualke pregunta bo por yama na 5100087.