WILLEMSTAD, Djasabra último Fundashon Alton Paas tatin un dia habri pa komunidat por a bin sera konosí ku e diferente insiativanan di Fundashon Alton Paas, skucha sierto datonan ku tin di haber ku dwarslaesie i desabilidat na Kòrsou i tambe ku komunidat por a skucha algun testimonio di personanan ku a mehorá nan kalidat di bida hasiendo uso di loke Fundashon Alton Paas ta brinda.
Komunidat tin ya kaba mas ku 6 aña ta tende di Fundashon Alton Paas ku tin e meta pa konsientisa i traha riba un mihó bienestar pa personanan ku dwarslaesie. Aworaki ta birando mas fasil pa logra mustra e frutanan di tur e trabounan. Manera 
Presidente i Fundado di e fundashon ku ta señor Alton Paas mes a trese dilanti den su diskurso di apertura ku ta trabou di diferente persona a hasi tur esakinan posibel. Diferente boluntario, sostenedor i donantenan a pone ku awe diferente persona na Kòrsou awor tin un mihó kalidat di bida.
E parti mas informativo di e atardi tabata na momento ku tatin un presentashon di Migarda Martina ku ta un komisario den e direktiva di Fundashon Alton Paas i alaves ta fungí temporal komo e program manager di e AP Center kaminda personanan ta bin hasi ehersisio. Den su presentashon ela trese dilanti kon e Fitness Challenge Anual di Fundashon Alton Paas ta kultivá e komportashon di inklushon. Tambe a bini dilanti e nesesidat ku tin di informashon relashona ku dwarslaesie na Kòrsou i den Karibe i kon e kongreso ku Fundashon Alton Paas ta organisa den kolaborashon ku Revalidatie Centrum ta ekipá i eduká diferente profeshonal, medikonan i persona ku dwarslaesie riba e ultimo desaroyonan di dwarslaesie. Dor di e inisiativa ei Fundashon Alton Paas a keda invitá pa partisipa na un kongreso di rehabilitashon regional pa presentá kon e situashon aktual ta den Karibe. Tambe e kongreso a pone ku awor Fundashon Alton Paas ta miembro di NASCIC ku ta un konsorsio di persona i organisashonnan ku tin di haber ku dwarslaesie na Merka. E asosiashon aki ta traha hopi pa influesha investigashonnan pa kura i kuido. Esei ta nifika ku awor asta personanan ku dwarslaesie tin un bos pa tambe hasi un diferensia den e investigashonnan ku ta keda hasi pa por kumpli ku nos nesesidatnan asta aki na Kòrsou. Loke ku tambe tabata hopi interesante ta e datonan di e kantidat di kareda ku Wheelee ta hasi, kual ta e dos autonan aksesibel pa rolstul i tambe e kantidat di miembronan di e AP Center ku ta bin hasi ehersisio mensualmente. A para ketu tambe na e kantidat di personanan ku a haña ataka selebral ku awor aki ta e grupo mas grandi ku ta bini hasi ehersisio na AP Center.
E parti mas impaktante di e atardi tabata e dos testimonionan ku a bin dilanti di Heribert Jozefa i Curley Rock. Tur dos a konta 
kon nan a haña nan mes ku un paralisis i kon nan a logra kuminsa na e AP Center di Fundashon Alton Paas. Heribert a ekspresá kon e situashon ku ela pasa aden a pone ku ela perde hopi amistadnan ku e tabatatin promé pero awor e tin otro amigunan ora e bin train. Dor di mira otronan ku situashon mas pio kune ta train ku asina tantu determinashon ta motiv’é pa e tambe hasi mas esfuerso pa e sigui bai mas dilanti. Curley Rock tambe tabata komparti kon banda di su paralisis e tatin ku lucha ku mas komplikashonnan ku salu i ku na Fundashon e ta haña e sosten i motivashon pa e duna di su banda te ku awor e ta enkurashá mas hende pa no keda sinta na kas pero hasi nan esfuerso pa keda den moveshon. Un atardi sigur impaktante i ku ta mustra kiko ta posibel pa personanan ku 
dwarslaesie i tambe otro tipo di paralisis na Kòrsou.
Fundashon Alton Paas ta hopi kontentu i agradesido ku e asistensia i reakshonnan positivo di e Dia Habri.
Pa tur persona ku no a logra partisipá pero ku ke sa mas di loke nos ta hasi por tuma kontakto ku nos libremente dor di yama òf manda un whatsapp na e number 5100087.