Uniko sentro sertifiká pa Activity-Based Training den Karibe
WILLEMSTAD, Diadomingu ultimo Fundashon Alton Paas a hasi apertura ofishal di su sentro di ehersisio pa personanan ku un situashon neurologiko. Minister Armin Konket i un miembro di e centro sr John Russel a korta sinta pa e toke ofishal di e sentro ku ta karga e nòmber di AP Center.
Ya ta konosí ku Fundashon Alton Paas ta enkurashá tur hende ku kualke abilidat pa keda den moveshon. Esei a bira awor mas fasil pa personan ku paralisis despues di apertura ofisial di AP Center den Winkelcentrum Colon. Durante un mainta ameno un miembro di AP Center, sr John Russel huntu ku Minister Konket, kende a representa Minister Hensley Koeiman a kòrta sinta pa apertura ofishal di e sentro. Tabata tin un sala yen ku diferente persona di prensa, kolaborador i sostenedornan di Fundashon Alton Paas. Minister Konket i Minister Camelia-Römer a duna un palabra di elogio i enkurashamentu na Alton 
Paas i su team ku apesar di tur e difikultadnan tòg ta logra di hasi un diferensia pa personanan ku tin un desabilidat.
Despues sr. Alton Paas a duna informashon di AP Center i lokualnan ku AP Center ta ofresé. E sentro a start for di okober 2016 ku 8 persona i awor tin 44 persona ku diferente situashon neurologiko ta biniendo pa hasi ehersisio. Esaki ta personanan ku dwarslaesie, atake selebral, MS, Celebra Palsy òf otro situashonnan neurologiko. E personanan aki a bira miembro di e AP Center i ta bin train 3 òf 2 bia pa siman un ora. Diferente di e personanan aki tin adelantonan fysikamente.
Banda di esei e AP Center tin dos trainer sertifiká den un training spesial pa por duna un programa di Activity-Based Training. Esaki ta enfoká riba aktivá e sistema nervioso pa krea funshonnan spesifiko. For di òktober 2018 ku yudansa finansiero di Ministerio di SOAW a start un proyekto di kual 11 persona a pasa un temporada di 4 luna den e training intensivo. Durante e apertura a skohe pa klousura e proyekto kaminda por a skucha i mira testimonio di e 11 partisipantenan aki i nan logro. E tabata algu komovedor ku a sirbi komo inspirashon pa mas hende ku un situashon neurologiko haña konfiansa ku por mihó.
E proyekto aki tabata konsisti di 3 elemento kual ta Brucker Bio Feedback Method ku ta un terapia spesial ku ta midi e konekshon entre e mente i muskulo. E otro parti tabata self-help training duna pa Jacques Hasselmijer pa e aspekto mental. Kon pa fortika e mente ku e palabra i pensamentunan korekto pa alkansa kada persona su meta. E di tres elemento tabata e Activity-Based Training ku a keda duna pa e dos trainernan sertifika kual ta Michel Jourdain i tambe dr. Valentina Londoño.
Esaki a habri un etapa nobo ku un persona no mester biaha bai Merka pa un programa asina aki paso awor Korsou ta ekipa ku ekiponan spesial i tambe e konosementu pa por yuda un persona. Esei ta duna Korsou tambe un bentaha entre islanan den Karibe dor di ta e promé i uniko ku e kolaborashon esklusivo ku e kompania Neuro Ex Inc. ku ta sòru pa kapasitashon kontinuo di e materia pa asina garantisá ku kada persona por risibi un programa spesial segun nan metanan. Loke ta importante pa enfatisá ta ku AP Center no por duna un garantia ku tur hende lo eksperensia mesun resultado. Kada persona ta distinto. Tin hende ku a haña sensashon bou di e nivel di nan leshon, tin hende ku a kuminsa bai af miho. Tin hende ku a kuminsa move nan pia. Pues kada persona ta distinto i por eksperensia resultadonan distinto. Pesei Fundashon Alton Paas ke enkurashá tur hende ku por tin un dwarslaesie, atake selebral òf otro situashon neurologiko pa tuma kontakto ku AP Center via e number òf whatsapp 5100087 i hasi kualke pregunta i pasa na Colon, unit 004 tur mainta entre 9or pa 12or i atardi riba djaluna, djarason i djabierne entre 2’or pa 6’or pa tira bista riba e ekiponan i wak kon abo tambe por mantené bo mes den kondishon fisiko.