3rd Caribbean SCI Congress

ASESIBILIDAT DEN UN PERSPEKTIVA MAS AMPLIO

Willemstad – Fundashon Alton Paas den un estrecho kolaborashon ku Revalidatiecentrum Curaçao, Neurosiruhano Dr Ellianne Dos Santos Rubio i Ministerio di GMN ta organisá e di 3 kongreso titulá “Understanding Spinal Cord Injury and Life After – Accessibility in broader Perspective”. Esaki lo tuma lugá dia 28, 29 i 30 di september 2018 na Santa Barbara Beach & Golf Resort. E kongreso aki lo sirbi pa amplia konosementu i profundisá riba kon nos por optimalisá e kuido posterior pa un mihó kalidat di bida pa personanan ku ‘dwarslesi’. Lo tin tantu oradornan lokal komo internashonal ku lo elaborá riba diferente tópiko.

Durante un rueda di prensa Fundashon Alton Paas a trese dilanti ku kada 2 aña – komo parti di su meta pa trese konsientisashon i mehora kalidat di bida di personanan ku dwarslesi – ta aserka interesadonan pa organisá un kongreso. E promé kongreso a start 4 aña pasa na 2014. Na 2016 tabatin e di dos i pa aña 2018 tin e di 3 kongreso programá pa dianan 28, 29 i 30 di september 2018. E di tres kongreso e aña aki ta pone atenshon riba asesibilidat den un perspektiva mas amplio. Den e reportahe di WHO ‘International perspective on spinal cord injuries’ ta definí ku e bareranan pa servisio i infrastruktura ta restringí partisipashon i un miho kalidat di bida pa personanan ku tin dwarslesi. E bareranan ta falta di maneho i provishon adekua, falta di fondo, falta di asesibilidat fisiko, aktitut negativo i falta di konosementu. Pa atende ku e bareranan aki a skohe e tema ‘Asesibilidat den un Perspektiva mas Amplio ku konsentrashon riba 3 area: 1) Asesibilidat na Inklushon ku énfasis riba maneho, 2) Asesibilidat na kuido apropia for di perspektiva mediko pa amplia konosementu i 3) Asesibilidat na aktitut positivo pa apoyo sosial.

E kongreso ta start dia 28 sèptèmber ku atenshon riba e parti di maneho. Ministerio di GMN tambe lo ta presente na e di 3 kongreso. Sra Minister Suzy Camelia Romer lo hasi apertura i Dr. Alcala, representando Ministerio GMN lo trata e topiko Maneho i Provishon. Orador prinsipal lo ta Stanley Lalta di Trinidad & Tobago. Dr. Lalta ta un dòktòr den Ekonomia di salú i lo atende e topiko “Accessibility to Achieve Health, Wealth and Societal Well-being for the Spinal Cord Injury Community”. E djasabra 29 di sèptèmber ta konsentra riba e parti mediko. E dia aki ta kompletamente den man di Revalidatiecentrum Curacao kaminda tantu dr. Juan Martina komo dr. Ayal Zahavi lo guía e dia. Un aspekto pa ku kousa di dwarslesi lo bini dilanti e dia aki trese pa dr. Dos Santos Rubio, neurosiruhano na St. Elisabeth Hospital. Dr. Dos Santos Rubio a konstata ku hopi hende na Kòrsou tin un Cervical Canal Stenosis ku ta hasi e persona mas vulnerabel pa haña dwarslesi i ku tin hopi hende ku tin dwarslesi sin nan sa. Durante e kongreso Dr. Dos Santos Rubio lo amplia riba esaki. Djadomingu 30 sèptèmber e topikonan ta e persona ku dwarslesi, famia i komunidat. Lo tin tambe un dialogo/debate entre algún persona ku dwarslesi i dr. Juan Martina. E otro oradornan ta di Korsou, Hulanda, Merka, Jamaica i Haiti. Tur persona ta bon bini. Nos lo tin posibilidat di tradukshon ku tur persona por sigui e kongreso den e idiomanan Papiamentu, Ingles òf Spaño.

E di 3 kongreso aki ta uniko tambe pa motibu ku Fundashon Alton Paas a tuma e inisiativa pa bini ku un ‘pre-congress workshop’ pa trese islanan di Karibe huntu pa start ku un Caribbean SCI Network. Un invitashon firmá pa Fundashon Alton Paas, Dr. Juan Martina komo revalidatiearts na Revalidatiecentrum Curacao i tambe Dr Ellianne Dos Santos Rubio, neurosiruhano na Sehos a bai pa islanan den Karibe invitando nan pa partisipá na e kongreso speshalmente e pre-kongreso pa lanta e network. E Caribbean SCI Network lo sirbi komo un plataforma pa edukashon, interkambio, desaroyo di kapasidat i inbestigashon. E inisiativa aki a keda aploudi tambe pa e organisashon internashonal ku ta International Spinal Cord Society (ISCoS). Dr. Federico Montero, miembro di ISCoS i tambe exkordinado pa PAHO/WHO pa asuntunan di desabilidat den Latino America i Caribe, ku tambe tin dwarslesi lo guia e workshop pa lanta e Caribbean SCI Network.  Un persona mas ku ta orador i ku lo duna su sostén durante e workshop ta Dr. Kim Anderson. Dr. Anderson tambe tin dwarslesi i e ta un profesòr den Medisina Fisiko i di Rehabilitashon. Dr. Anderson ta presidente di North American Spinal Cord Injury Consortium (NASCIC) i a aserka Fundashon Alton Paas pa bira miembro. Fundashon a apliká i dia 12 di Yuli ultimo a bira miembro ofishal di NASCIC. NASCIC ta trese huntu organisashonnan, personanan òf gruponan di interés ku ta traha na bienestar di personanan, nan famia i komunidat ku dwarslaesi.

E aña aki tambe organisadornan a hasi petishon pa akreditashon ku a keda otorgá pa e organisashon di CAN-Curaçao pa un total di 11 punto na dòkternan. Organisashon a aserka tambe Nederlandse Vereniging voor Revalidatieartsen na Hulanda ku tambe a akreditá e kongreso ku 11 punto pa revalidatieartsen. E kongreso ta menshoná riba wèpsait www.revalidatiegeneeskunde.nl, www.naskho.org i www.cancuracao.org. Pa tur informashon por subi e wèpsait di kongreso http://cscic.fundashonaltonpaas.org. Tur persona ku kier registrá pa e kongreso lo mester hasi esaki via e wèpsait. Tin un “Early Bird price” pa tur persona ku registrá tempran. Esaki ta balido te ku dia 25 ougustus 2018. Inskripshon ta será dia 8 di sèptèmber 2018.

Den e próksimo periodo Fundashon Alton Paas i Revalidatiecentrum Curaçao ta bai duna informashon na diferente medio di komunikashon tokante e kongreso i tambe e workshop.